గాజులరామారం (సర్కిల్-57) పరిధి లాల్ సాబ్ గూడ రోడ్డు లో ఉన్న క్రీడా ప్రాంగణంలో (స్పోర్ట్స్ కాంప్లెక్స్) మిగిలి ఉన్న అభివృద్ధి పనులను జూన్ 2, 2026 నాటికి పూర్తి చేసి, ప్రజలకు అందుబాటులోకి తేవాలని కుత్బుల్లాపూర్ జోనల్ కమిషనర్ పింకేష్ కుమార్ సంబంధిత ఇంజినీరింగ్ అధికారులను ఆదేశించారు.
_ అధికారులను ఆదేశించిన కుత్బుల్లాపూర్ జోనల్ కమిషనర్ పింకేష్ కుమార్
లోకల్ వైబ్స్, కుత్బుల్లాపూర్: గాజులరామారం (సర్కిల్-57) పరిధి లాల్ సాబ్ గూడ రోడ్డు లో ఉన్న క్రీడా ప్రాంగణంలో (స్పోర్ట్స్ కాంప్లెక్స్) మిగిలి ఉన్న అభివృద్ధి పనులను జూన్ 2, 2026 నాటికి పూర్తి చేసి, ప్రజలకు అందుబాటులోకి తేవాలని కుత్బుల్లాపూర్ జోనల్ కమిషనర్ పింకేష్ కుమార్ సంబంధిత ఇంజినీరింగ్ అధికారులను ఆదేశించారు. క్రీడా ప్రాంగణంలో జరుగుతున్న పనుల పురోగతిని ఆయన బుధవారం గాజులరామారం డెప్యూటీ కమిషనర్, ఇతర అధికారులతో కలిసి క్షేత్రస్థాయిలో నిశితంగా పరిశీలించారు.
ఈ సందర్భంగా పర్యావరణహిత మౌలిక సదుపాయాల కల్పనపై ఆయన ప్రత్యేక దృష్టి సారించారు. క్రీడాకారులు, సందర్శకుల కోసం పచ్చదనంతో కూడిన ఆహ్లాదకరమైన నడక మార్గాలను (గ్రీనరీ పాత్వేస్) అభివృద్ధి చేయడంపై అధికారులతో చర్చించారు. ఈ పచ్చదనం క్రీడా ప్రాంగణానికి అందాన్నివ్వడమే కాకుండా, క్రీడల సమయంలో స్వచ్ఛమైన గాలిని అందించే ‘హరిత ఊపిరితిత్తులు’ (Green Lungs) లాగా పని చేస్తాయని, ఆరోగ్యకరమైన వాతావరణానికి ఇవి ఎంతో కీలకమని కమిషనర్ స్పష్టం చేశారు.అనంతరం క్రీడా ప్రాంగణంలో మిగిలిపోయిన (బ్యాలెన్స్) పనులపై అధికారులతో ఆయన సమీక్ష నిర్వహించారు. నిర్మాణపు తుది దశ పనులను వెంటనే వేగవంతం చేయాలని అధికారులకు దిశానిర్దేశం చేశారు. పర్యావరణహితమైన, అత్యుత్తమ క్రీడా కేంద్రంగా దీనిని తీర్చిదిద్ది, నిర్ణీత గడువులోగా పూర్తిస్థాయిలో వినియోగంలోకి తీసుకురావడమే లక్ష్యంగా పని చేయాలన్నారు.
ఈ తనిఖీల్లో జోనల్ కమిషనర్తో పాటు డెప్యూటీ కమిషనర్, డిప్యూటీ ఈఈ (ఎస్డబ్ల్యూఎం), ఏసీపీ, ఏఈ, అర్బన్ బయోడైవర్సిటీ (యూబీడీ) మేనేజర్ తదితర అధికారులు పాల్గొన్నారు.
